كيفية اختيار الكمامة المناسبة
بقلم أ.د. عمرو حسن الحسني أستاذ المخ و الأعصاب جامعة القاهرة
#بوست_الجمعة النهاردة عن "البامبرز و الكافولة"🙄
ايه ده معقول بعد "دكتوراة في حتي" و " النظم المحاسبية" ادحدر بيك الحال و بقيت بتتكلم عن البامبرز 🤔
اه حضرتك .. عشان البلد هتفتح بكرة فتحا مبينا .. مساجد ومطاعم و قهاوي ( لو ربنا نولهالك و بقيت من ٢٥%.. ربنا يكتبها لكل مشتاق😁)
حرفيا .. الدنيا ممكن تبقي مليطة لو مخدناش بالنا .. كل واحد بقي مسئول عن نفسه .. اخدم نفسك بنفسك علي رأي كابتن ميمي الشربيني⚽
برضه ايه علاقة ده بالبامبرز و الكافولة👼
أعزكم الله
البامبرز هو الكمامه(سواء N95 او الجراحي)
و الكافوله هو الكمامة القماشية
آسف للتشبيه لكن مضطر لكده عشان أوضح للناس كيفية التعامل مع الكمامات لأن رغم ان الغالبيه العظمي ملتزم شكلا بالكمامات ..لكن موضوعا و حقيقة .. الاستخدام في كتير من الأحيان خاطيء جدا جدا و بالتالي ممكن تكون الفايدة قليله أو معدومه
البوست ده لتوضيح الصح من الغلط
هتقولي يعني اللي جالهم مكانوش ملتزمين.. كلة رايح(بصوت عم ضياء😒) .. اقدر اقولك اه .. الفيروس اكيد دخل في لحظة عدم التزام .. الجول بيجيي في ثانيه⚽ ... و ان التزامك الكامل هيقلل جدا جدا من فرصة إصابتك بالفيروس
✅الكمامة لازم تغطي الفم و الأنف بالكامل و ميبقاش في فراغات خالص بينها و بين الوجه .. لدرجة ان منظمة مكافحة العدوي(CDC) اعتبرت دقن الرجاله الموضه دي .. بتقلل كفاءة الماسك و نزلوا اشكال الشعر و الدقن المختلفه و تأثيرها علي كفاءة الماسك💇🏻♂️ .. المنظمة قلبت جولدن فنجرز خالص 😅(المصدر في التعليقات )
✅ قبل لبس الكمامة و لمسها ..اغسل اليدين كويس أوي بالماء والصابون قبل الإمساك بالكمامة و لبسها لمدة 20 ثانية للتأكد من نظافة اليدين و بعد كدة نشفها بفوطة نظيفة.
✅الجزء اللي فيه سلك داخلي مرن ده بيبقى فوق غشان يمكن طيه لضمان تشكيله علي شكل الأنف وتغطية المنطقة جيدًا.
✅ الجانب الملون من الكمامة هو الجزء الخارجي بيبقي ناحية بره، أما الجانب الأبيض بيبقي ناحية الوجه.
✅البامبرز بيتلبس من الاستك او من الاربطة ..متلمسش جسم الماسك نفسه
✅يجب تغيير الكمامة بواحدة جديدة بعد أن تصبح رطبة لأنها هتكون غير مجدية (زي البامبرز اللي اتبل كده.. بيتغير )
✅ممكن لبس الكمامه القماشيه بس لازم تبقي عارف انها اقل حمايه من الماسك الجراحي اللي هو لونه لبني ده
(نفس فكرة الكافوله بتاعت زمان .. بتدي حماية بس مش أوي و مش زي البامبرز و لازم غسلها باستمرار)
✅يفضل الكمامه القماش الثقيله التخينه(الابحاث قالت كل ما كانت القطن اتقل و الطبقات اكتر و كذا نوع من القماش فوق بعض كل ما يدي حماية اكتر
(المصدر في التعليقات ....بحث حلو اوي عن أنواع الاقمشه المستخدمة في الماسكات القماشيه و المقارنة بين فعاليتها
(very good article for health care professional)
✅لازم تغسل الكمامة القماش يوميا (زي الكافوله المستعمله مش بتتلبس تاني بالببي(البراز) 🤮
طريقة غسلها الصح ..إما في الغساله الاوتوماتيك بماء دافي .. او ملعقة مسحوق علي لتر ماء ساخن و تتنشر في الشمس و لذلك خلي عندك كذا واحده تبدل فيهم لو بتنزل كل يوم (زي الكوافيل زمان .. اكيد العيل كنا بنشتريله كذا كافوله)
(المصدر لطريقة الغسل الصح حسب منظمة مكافحة العدوي CDC في التعليقات)
✅اغسل ايدك بالماء و الصابون عمال علي بطال .. الكحول و المطهر مهمين جدا في ايديك .. بس لا يغنوا عن الغسل بالماء والصابون كل شوية
❌متلبسش كمامة فضفاضة بتسرب من حواليها (اتفقنا الكمامه زي البامبرز المفروض ميسربش😉) و برضه متكونش الكمامة مشدودة جدا لدرجة أنه يصعب التنفس من خلالها😷 (زي البامبرز المشدود أوي ممكن يعمل التهابات و تسلخات)
❌متستخدمش كمامة مقطوعه أو استكها بايظ😏
❌ متنزلش الكمامة ..الكمامة لازم تغطي الفم و الانف بالكامل .. مش فاهم فكرة الناس اللي بتغطي بقها و تسيب مناخيرها تتهوي هل حضرتك معقم مناخيرك في الاوتوكلاف قبل ما تنزل من البيت🤥
❌ لا تنزع الكمامة مطلقا و لا حتي تزيحها إذا كان هناك أشخاص علي بعد متر واحد منك..تعامل مع أي شخص إنه مصاب بالمرض مهما كنت واثق فيه .. كتير حاملين الفيروس و هما مش عارفين و مش باين عليهم أي أعراض⚠️
❓ده سؤال مش نصيحه .. ايه فكرة انك تبقي لا بس الكمامة طول الوقت و أول ما تقعد قدامي في العيادة تنزلها .. لا بجد مش فاهم.. ده فيه تقريبا شبه إجماع علي كده😂 ... لا و برضه في اجماع علي الرد" معلش يا دكتور عمرو. بتخنقني"😂
❌لا تستخدم كمامة متسخه أومبلولة ( البامبرز المتسخ مش بيتلبس تاني)🤮
❌ لا تشارك كمامتك مع الآخرين ( ما ينفعش تاخد بامبرز استعمله عيل تاني و تلبسه لأبنك🤢)
❌ متلمسش الكمامة من الوسط خالص .. عايز تقلعها شيلها من الاستك او من الاربطه (لما بتلمس الكمامة من الوسط كأنك بتقلع طفل البامبزر من الحته اللي فيها الببي 🤢)
❌ لا تتعامل مطلقا مع حد مش لابس كمامة ... ده حد بيعمل ببي في وشك
❌ بلاش جوانتيات عشان خاطر ربنا🙏🏻🙏🏻🙏🏻 ..لابسين الجوانتيات من صباحية ربنا لغاية ما تروح تلمس بيها كل حاجه بنفس الجوانتي اللي بيشتغل مغناطيس تلم بيه الميكروبات و الفيروسات.
يا جماعه ده بيزود تعرضك للعدوي لان حضرتك ما بتغسلش اديك ووارد تلمس حاجه ملوثه وبعدين تلمس جسمك. الجوانتي بيديك احساس خاطئ بالامان.
اقولك حاجه ..الجوانتي ده عامل زي ما تكون بتلعب في ببيهات كل العيال بس بايد متغطية ..🤢
آسف علي البوست أبو ريحه ده علي الصبح كده😀
بس ده أقرب تشبيه ينفع أقوله .. فيه تشبيهات تانيه متنفعش🤣
متعكم الله بالصحة والعافية
